TKNIKA, UNESCOren UNEVOC SAREKO KIDE OFIZIAL BIHURTU DA
Sarrera hau beste hizkuntza hauetan dago eskuragarri: English, Español
TKNIKA da Estatuan aitorpen hau jaso duen zentro bakarra
UNEVOC Unescoren Hezkuntza eta Prestakuntza Tekniko eta Profesionalerako Zentroak, lan mundurako prestakuntza sustatzea du helburu
UNESCOren UNEVOC Nazioarteko Zentroaren zuzendariaren, Shyamal Majumdar doktorearen bisita izan dugu gaur TKNIKAn. Bisitaren helburua izan da ofizialki egiaztatzea TKNIKA UNEVOC sareko kide izango dela hemendik aurrera. Estatu osoan aitorpen hori duen zentro bakarra izango da, beraz, TKNIKA.
Eusko Jaurlaritzako Lanbide Heziketako Sailburuordetzak koordinatuta egin den errekonozimendu-ekitaldian parte hartu dute Eusko Jaurlaritzako Kanpo Harremanetarako ordezkariek, SPRIren nazioarteko arduradunek, CONFEBASK eta OSKESTRAren ordezkariek, Lanbide Heziketako ikastetxe-sareen ordezkariek eta beste organizazio batzuetako nazioartekotzearen arduradunek.
Amaierako lan-mahaian, Euskadin UNEVOC zentro bat izateak zabaltzen dituen aukeren berri eman die Majumdar doktoreak bertaratuei. Orain arte TKNIKA Europa mailako erreferentziako zentroa izan da, eta hemendik aurrera Hezkuntza eta Prestakuntza Tekniko eta Profesionalaren arloko mundu osoko eragile gailenekin partekatuko ditu esperientziak.
UNEVOC- Hezkuntza eta Prestakuntza Tekniko eta Profesionalerako Nazioarteko Zentroa
UNEVOC sarea Hezkuntza eta Prestakuntza Tekniko eta Profesionalerako (EFTP) plataforma global espezifikoa da Unescoren baitan, eta Hegoaldeko herrien arteko eta Iparraldeko eta Hegoaldeko herrien arteko lankidetza sendotzea du helburu, beti ere lan mundurako ikaskuntzari dagokion arloan. UNEVOC sarea osatzen dute EFTPko erakundeen barruan diharduten UNEVOC zentro indibidualek, eta EFTPko nazioarteko eta eskualdeetako lankidetza-eskaintza koordinatzen dute.
Sareari esker, UNEVOC zentro indibidualek EFTPren edozein alderdiri buruzko ezagutzak eta esperientziak parteka ditzakete elkarrekin, esperientzia nazionalak truka ditzakete eta guztientzat garrantzizkoak diren gaiak eztabaida ditzakete, eurek edo UNESCO-UNEVOC Nazioarteko Zentroak antolatutako bilera errealen esparruan.
