SkillAIbility Batzar Nagusia Trondheimen

Sarrera hau beste hizkuntza hauetan dago eskuragarri: English, Español

SkillAIbility taldea Trondheimenen (Norvegian) bildu zen bere bigarren Batzar Nagusia ospatzeko, SINTEF eta Norvegiako Zientzia eta Teknologia Unibertsitatearen (NTNU) antolakuntzapean. Hiru egunez, Europako hainbat herrialdetako bazkideek tailerretan, aurkezpenetan eta eztabaidetan parte hartu zuten, Industria 5.0 ikuspegiarekin bat etorriz, hau da, “Zer egin dezake teknologiak pertsonen mesedetan?” galderari erantzuteko, gizakia erdigunean jartzen duten ikuspegiak garatzeko.

Bilera osoan zehar hainbat tailer egin ziren. Chalmers Teknologia Unibertsitateak gidatutako saioan, parte-hartzaileek aztertu zuten nola egokitu daitezkeen fabrikazio-sistemak pertsonen beharretara. Saio parte-hartzaileen bidez, faktore humanoak teknologia digitalekin uztartzea, gaitasun-hausturak identifikatzea eta erabiltzaile-talde ezberdinetarako irtenbide inklusiboak diseinatzea landu zen.

Ondoren, Groningengo Unibertsitateak (RUG) antolatutako tailerrean, Learning Factory inklusiboen diseinuan sakondu zen. Bertan erakutsi zen nola adimen artifizialak lagundutako prestakuntzak ikasle mota desberdinei lagundu diezaiekeen, hala nola gaitasun gutxiko langileei, adinekoei edo desgaitasunen bat dutenei. Ondorengoa ideia indartu zen: teknologiak pertsonetara egokitu behar du, eta ez alderantziz.

Azken eguna SINTEF erakundeak antolatu zuen, eta pertsonen zerbitzura dauden adimen artifizialeko teknologiak diseinatzea izan zen ardatza. 5. lan-paketean (WP5), Zacharoula Papamitsiouk eta Patrick Mikalefek Echelonized Design Science Research (eDSR) metodologia azaldu zuten, arazo errealak definitzeko, diseinu-helburu bihurtzeko eta giza-AA interakzioen inklusibitatea eta erabilgarritasuna ebaluatzeko.

Tknikaren ekarpena – Work Package 4
Batzar Nagusiaren zati batean, arreta berezia jarri zen WP4n: Human-Tech Training Design, Tknikak gidatzen duen jarduera honetan. Ion Hernandezek, Tknikaren ordezkari gisa, urriaren 7an aurkeztu zuen lan-pakete honen aurrerapena, Learning Factoryen ikuspegi humanozentrikoetara egokitutako metodologiaren garapena azalduz..

WP4ren helburua da prestakuntza-inguruneak diseinatzea, hezkuntza eta industria elkarrengana hurbiltzeko — lanbide-heziketaren eta benetako fabrikazio-inguruneen arteko zubia eraikiz. Lan honek pertsonen gaitzea, parte-hartzea eta teknologiarekin lankidetza sustatzen ditu, eta aldi berean tresna digital berriak txertatzen ditu, hala nola adimen artifiziala (AA), errealitate birtuala eta areagotua (VR/AR), eta robotika kolaboratiboa (cobots).

Tknikaren eginkizun nagusien artean daude:

• Ikasketa-fabrika humanozentrikoetarako metodologia garatzea, gaitasunak eta inklusioa ebaluatzeko adierazle nagusiak (KPIak) barne hartuta.
• Lanbide-heziketarako metodologia didaktikoak gidatzea, Industria 5.0-ren balioekin bat etor daitezen.
• Irakasleentzako gida eta ikasketa-planen eguneratzeetarako gomendioak sortzea, teknologia berriak eta ikuspegi pedagogiko inklusiboak txertatuz.

Horretaz gain, Ion Hernandezek Tknikaren lan pedagogikoa, Bloom-en Taxonomia eta SMART printzipioaren bidez, Arazoetan Oinarritutako Ikaskuntzan (PBL) eta Ikaskuntza Autonomoan (SDL) oinarritua azaldu zuen. Horrela, ikasleek ez dute soilik ezagutza teknikoa eskuratzen, baizik eta gaitasun transbersal eta inklusiboak ere garatzen dituzte, gaur egungo fabrikazio-ingurunera egokitzeko funtsezkoak direnak.

Batzar Nagusiko saio guztiek SkillAIbility proiektuaren ikuspegi bateratua indartu zuten: etorkizuneko fabrikazio-sistemek pertsonak erdigunean jarri behar dituzte, eta gizakien eta teknologia adimendunen arteko lankidetza sustatu.

Kontsortzioak eskerrak eman zizkion SINTEF eta NTNUri topaketa hartzeagatik eta lankidetzarako ingurune bikaina eskaintzeagatik. Ekitaldiak beste urrats garrantzitsu bat izan zuen SkillAIbilityren misioan, hau da, berrikuntza humanozentrikoa, inklusiboa eta jasangarria sustatzea Europako fabrikazio eta lanbide-heziketa sektoreetan.