Tknika: 20 urte Euskadiko Lanbide Heziketako berrikuntza bultzatzen
Sarrera hau beste hizkuntza hauetan dago eskuragarri: Español
Tknikan bi hamarkadako ibilbidea ospatzen dugu Euskadiko Lanbide Heziketako ikerketa eta berrikuntza aplikatuko zentro gisa. 20 urte hauetan, Lanbide Heziketako Euskadiko 2030 Estrategiaren funtsezko eragile bihurtu gara, eta modu erabakigarrian lagundu dugu Euskadiko LH nazioarteko erreferente izaten, bikaintasunean, berrikuntzan eta pertsonenganako konpromisoan oinarrituta.
Urteurren honek aukera eman digu egindako bidea partekatzeko Lanbide Heziketako Ikastetxe Integratuetako eta erakunde laguntzaileetako ia laurogeita hamar ordezkarirekin, Errenteriako gure instalazioak bisitatu dituztenekin. Ekitaldian parte hartu dute Hezkuntzako sailburu Begoña Pedrosak, Tknikako zuzendari Pili Alonsok eta Lanbide Heziketako sailburuorde Jon Labakak.
Sortu zenetik, Tknikak misio argia izan du: Euskadiko Lanbide Heziketako sistemaren berrikuntza-palanka izatea. Denboraren poderioz, misio hori errealitate aitortu bihurtu da, bai gure inguruan bai nazioartean ere. Gaur egun, lankidetzarako, ikaskuntzarako eta eraldaketarako gunea gara; hezkuntzaren, enpresaren eta gizartearen arteko topagunea, non berrikuntza aurrerapen ekonomikoaren, sozialaren eta pertsonen ongizatearen zerbitzura jartzen den.
Gure jardunak Lanbide Heziketako eredu sendo bat sendotzen lagundu du: lurraldean errotua, mundura irekia eta enpresen errealitatearekin estuki lotua, pertsonen garapen profesionala eta pertsonala erdigunean jarriz.
Tknika, Lanbide Heziketako Euskadiko 2030 Estrategiaren palanka
Euskadiko Lanbide Heziketa etengabe hazten ari den eredu arrakastatsua da, etorkizuneko erronkei aurre egiteko prestatua. Testuinguru horretan, Lanbide Heziketako Euskadiko 2030 Estrategiak norabide partekatua ezartzen du Lanbide Heziketa Integralaren sistema garatzen jarraitzeko, eragile sozioekonomikoekin elkarlanean.
Estrategia hori bost ardatz nagusiren inguruan egituratzen da —talentua, berrikuntza, jasangarritasuna, digitalizazioa eta nazioartekotzea—, gure jarduna gidatzen dutenak eta Lanbide Heziketaren papera lehiakortasunaren eta kohesio sozialaren motor gisa indartzen dutenak. Estrategiaren garapenak 65 milioi euroko inbertsioa izango du 2026an, eta 325 milioi euro baino gehiago mobilizatuko ditu indarraldia irauten duen bitartean.
Tknikan uste dugu Lanbide Heziketan inbertitutako euro bakoitza enpleguan, berrikuntzan eta ongizatean egindako inbertsioa dela, eta herri-apustu estrategiko honetan dagokigun erantzukizuna bere gain hartzen dugu.
Amaitzeko, Tknika osatzen duten pertsona guztien konpromisoa, ezagutza eta inplikazioa aitortu nahi ditugu. Haien eguneroko lanari esker, proiektu honek hazten eta Euskadiko Lanbide Heziketako sisteman eta gizartean benetako eragina sortzen jarraitzen du.
