Termografia infragorri bidezko DED-Arc Fabrikazio Aditibo prozesuen monitorizazioa.
Sarrera hau beste hizkuntza hauetan dago eskuragarri: English, Español
Hari ekarpen eta arku bidezko fabrikazio aditibo prozesua DED (“Directed Energy Deposition”) izenez ezagutzen den prozesuen familiakoa da. Prozesu honetan materialaren ekarpena metalezko ari baten bidez egiten da, eta metal hau arku elektriko baten eraginpean urtu egiten da metalezko urtutako bainu bat sortuz. Ondoren, bainu hori solidotu eta pieza izango denaren material parte bihurtzen da. Pieza osatuko duten geruzak, programatutako ibilbideen arabera eratzen dira, azken piezari forma emanez. Bainu urtu horren propietateak eta portaera aldatu egiten dira posizioaren eta tenperatura-gradientearen arabera, eta aldatu egiten da, sortutako solidoak gero eta tenperatura handiagoa hartzen duen heinean.
Erraza da aurreikustea prozesu hori, soldadura bezala, “prozesu berezitzat” hartu behar dela, tartean dauden aldagaien aniztasuna dela eta. Arrakastaz aplikatzeko, prozedura espezializatuak ez ezik, denbora errealeko monitorizazio-sistemak ere behar dira, egin behar den pieza fabrikatzeko prozesua, behar bezala garatzen dela ziurtatzeko.
Monitorizazio-teknologien barruan, batzuk erradiazio infragorriaren neurketan oinarritzen dira, bai neurketa puntualeko termometroen bidez (pirometroak), bai kamera bidez, tenperatura puntualaren neurketa ez ezik, fusio-bainuaren eremu osoaren irudiak ere ematen dituztenak. Kamera horiek informazio zehatza eskaintzen dute neurtutako guneko edozein puntuari dagokionez edo eremuen neurriei dagokionez ere.
Fabrikazio Aditibo Metalikoa bezalako aplikazioetan ikusmen-kameren eta termografikoen presentzia zabala izan zen Soldadura Azoka Industrialaren (Schweissen & Schneiden) azken edizioan ikusi genuen joera nabarmenetako bat. Ekitaldi hori lau urtean behin egiten da Alemaniako Essen hirian. Beste joera nabarmen bat izan zen lankidetzazko roboten edo “cobot” en erabileraren gorakada nabarmena, soldadura arloko mota askotariko aplikazioetarako.
Kamera hauen ahalmena apartekoa da; izan ere, prozesua denbora errealean kontrolatzeaz gain, hainbat datu mota eskuratzeko aukera ematen dute, hala nola tenperatura-puntuak, eremuak eta puntuen arteko gradienteak. Datu horiek gero aztertzeko erregistratzen dira, eta, horri esker, joerak, funtzionamendu-ereduak eta piezak fabrikatzean sor litezkeen arazoak identifikatu daitezke.
Hari bidezko fabrikazio aditiboko prozesuek monitorizazio-teknologia aurreratuak behar dituzte, lanen garapen egokia eta bideragarritasun industriala bermatzeko; horrez gain, adimen artifizialeko eta fabrikazio-eredu konplexuen gaineko ikaskuntza automatikoko teknologiak aplikatzeko prozesu ezin hobeak dira, ikerketa eta berrikuntza aplikatuaren sektorerako aukera handiak sortuz.
