LANDARRAIN

Lanbide-Heziketari Aplikatutako Bioekonomiako Sarearen barruan,  Elikagaien industria, Hostalaritza eta Turismo eta Nekazal Lanbide Heziketako familiekin elkarlanean, Landarrain Elikagaien Berrikuntzarako Laborategiak baliozko elikadura-kateko produktu berrietan ikertu eta berrikuntza garatzen du.

Gure instalazioetan sistema akuaponiko baten bidez, akuikultura hidroponiarekin konbinatzen da arrainak eta barazkiak birzirkulazio-sistema batean ekoizteko. Arrainen produkzio-tangetako hondakin-ura mantenugai-iturri gisa erabiltzen da landareentzat eta horiek, aldi berean, iragazki biologikoen eginkizuna betetzen dute eta garbitu egiten dute tangetara itzultzen den ura. Horrela, sistema orekan mantentzen da eta uraren kalitate egokia ziurtatzen da.

Orain arte garatu diren esperientziek erakutsi dute akuaponiak hainbat abantaila dituela arrain eta landareen hazkuntza-metodo konbentzionalen aldean.

Akuaponiaren bitartez ura berrerabiltzea bultzatzen da, produkzio-espazioaren erabileraren eraginkortasuna eta produktibitatea maximizatzen dira, sistemaren trazabilitate osoa ziurtatzen da, landare-espezie jakin batzuen produktibitatea hobetzen da, eta produkzioa arrain-espezieekin dibertsifikatzen da. Gainera, sistema akuaponikoa arrain-haztegi konbentzionalena baino eraginkorragoa da, kalitate handiagoko produktua eskaintzen baitu, eta azken eskaintza landareekin dibertsifikatzen du.

Tknikako Landarrain proiektua produkzio-teknologia hori Euskal Autonomia Erkidegoan garatzeko ardatz artikular gisa egituratzen da, Euskal Autonomia Erkidegoko akuikultura-sektore teknifikatua eraikitzeko eta merkatuak kalitateko produktu berriz hornitzeko.

Horretarako, Europan akuaponia bidezko akuikultura jasangarrian erreferentzia diren instalazioak ditu Tknikak, ikerketara eta prestakuntzara bideratuak.