Ikastaro honetan CODESYS ingurunea eta Machines Simulator plataforma erabiliko dira automatizazio industrialeko oinarrizko aplikazioak garatzeko, simulatzeko eta biki digital batean balioztatzeko. Parte-hartzaileek Ladder eta ST lengoaiak landuko dituzte, bai aplikazio konbinazionaletan, bai GRAFCET metodologian oinarritutako aplikazio sekuentzialetan. Horrez gain, Machines Simulator ingurunearen oinarriak ezagutuko dituzte, simulatutako PLC batekin konektatzeko eta kodearen funtzionamendua biki digital batean probatzeko.
| FASEA/K | ORDUA/K | DATA | Ordutegia | MOTA |
|---|---|---|---|---|
| 1 | 5.00 | 26-05-2026 | 09:00 – 14:00 | ONLINE |
| 2 | 5.00 | 28-05-2026 | 09:00 – 14:00 | ONLINE |
| 3 | 5.00 | 02-06-2026 | 09:00 – 14:00 | ONLINE |
| 4 | 5.00 | 04-06-2026 | 09:00 – 14:00 | ONLINE |
| Ordu ez Presentzialak: 20.00 |
Konpetentziak
Ikastaro honen bidez honako gaitasunak garatuko dira:
- CODESYS automatizazio industrialerako software-garapenerako ingurunea ezagutzea.
- Ladder eta ST lengoaiak erabilita oinarrizko aplikazio konbinazionalak garatzea eta simulatzea.
- Ladder eta ST lengoaiak erabilita, GRAFCET metodologia aplikatuz, oinarrizko aplikazio sekuentzialak garatzea eta simulatzea.
- Kodea Machines Simulator inguruneko biki digital batean balioztatzea.
- Machines Simulator ingurunean norbere eredu digitalen garapenaren oinarriak ezagutzea.
Edukiak
CODESYS:
- Instalazioa eta ingurunearen oinarriak.
- Ladder lengoaia: oinarriak eta GRAFCET diagrama bat kodera pasatzeko metodoa.
- ST lengoaia (testu egituratua): oinarriak eta GRAFCET diagrama bat kodera pasatzeko metodoa.
- Simulazioa.
Machines Simulator:
- Instalazioa eta ingurunearen oinarriak.
- Simulatutako PLC batekin konektibitatea, haren kodea balioztatzeko.
- Norbere biki digitalen diseinura sarrera.
Metodologia
Ikastaroa online eskainiko da, modu sinkronoan, eta aurkezpenak eta ariketak Tknikako Moodle plataforman egongo dira eskuragarri. Klaseak praktikoak izango dira, azalpen teknikoak eta norbere garapenetarako denbora txandakatuz.
Parte-hartzaileek aipatutako softwareak instalatuko dituzte, modu gidatuan, ikastaroaren lehen orduan. Jarraipen egoki baterako, gutxieneko ezaugarri hauek dituen ordenagailu bat gomendatzen da:
- Sistema eragilea: Windows 10 edo 11, 64 bitekoa.
- Hardwarea: Intel Core i5 prozesagailua (2,5 GHz), 8 GB RAM memoria eta 20 GB libre biltegiratzean.
Ebaluazioa
Proposatutako ariketak erreplikatzea derrigorrezkoa izango da ikastaroa modu egokian osatzeko. Beraz, ziurtagiria lortzeko ezinbestekoa izango da proposatutako orduen % 90ean parte hartzea.
Baldintzak
EAEko Lanbide Heziketako ikastetxeren batean Elektrizitatea eta Elektronika edo Instalatze eta Mantentze Lanak familietako irakasle izatea.
Era berean, honako aurre-ezagutzak izatea beharrezkoa izango da:
- Aljebra boolearra: logika bitarra ulertzea (AND, OR, NOT).
- Oinarrizko elektrizitatea: ohiko aparatu elektrikoak ezagutzea —pultsagailuak, kontaktoreak, etab.— eta motorrekin maniobrak egitearen oinarriak ezagutzea.
- PLC oinarriak: funtzionamendu orokorra eta sarrera-irteera digitalak.
- Komunikazioak: OPC UA.
- Biki digitalak: antzeko tresnaren bat erabili izana.
Azkenik, interneteko konexio egonkorra izatea eta, ahal bada, azalpenak erosoago jarraitzeko bi monitore edukitzea garrantzitsua izango da.
Hautaketa irizpideak
Izen-emate kopurua eskainitako plaza kopurua baino handiagoa bada, honako irizpide hauen arabera egingo da hautaketa:
- Elektrizitatea eta Elektronika edo Instalatze eta Mantentze Lanak familietako irakasleek lehentasuna izango dute.
- Ahalik eta ikastetxe gehienek parte hartzea lehenetsiko da.
- Izen-emateko ordena.
Izen-emate datak eta informazioa
Prestakuntza-ekintza hau Europako Gizarte Funtsak kofinantzatu dezake, Lanbide Heziketako eta Prestakuntzako irakasleak prestatzera bideratutako ekintzen esparruan.
